رجعولي كوكبي ..
جملة بقولها و هفضل أقولها على طول ،
و أنا جي الكوكب دا قلت اتعرف عالدنيا قبل ما اخشها ..
و ضحكوا عليا !! ضحكوا عليا و أنا طفل ! اه زي ما بقولكم كدا .. اصل ايه
و أنا صغير قالولي ان الكوكب دا كله أخضر و زرع و نباتات و ورد .. و حيوانات لطيفة و ملك الغابة و القرد و الكلب اللولو هوّ هوّ و القطة المشمشية و الفار الذكي اللي بيساعد الأسد انه يخرج من المصيدة ..
و كان كل نافذتي على تلك الحياة .. عبارة عن " عالم سمسم " .. بجد نفسي كلنا نعيش في عالم سمسم مع نمنم و فلفل و خوخة و عم جرجس ! ..
عالم سمسم هو اليوتوبيا اللي كنت عايشها .. كله ضحك و لعب و هزار و اخلاق حلوة و روح جميلة و افيهات مهما كبرت بفضل اضحك عليها .. انا فاكر حلقات كاملة من 12 سنة !
و اما عن عالم السياسة : .. فكانت السياسة بالنسبالي " توم و جيري " .. توم اللي نفسه يخلص من جيري الفار الذكي عشان ياكله و عشان صاحبة البيت متضربوش .. توم كان على حق .. و جيري كان بيدافع عن نفسه ! و لكنه ساعات كان بيتسلى على توم عشان توم اغبى منه شوية كتيير ! و دا كان بيضايقني بس بضحك
اما عالم الجريمة و الكوكب الموحِش دا : .. كان بيمثلهالي "كونان" المحقق كونان اللي كان بيحل كل القضايا بطرق عجيبة و عن جزمته اللي بتطيير و عن دماغه العظيمة .. و لما كبرت و بطلوا يذيعوا كونان .. بقيت بتفرج على CSI و جريسوم اللي ماسكهم .. اللي عارف كل حاجة في الكوكب دا .. *و ما زلت بتفرج بأقصى انتباه و شغف*
اما عالم الحيوان و الخيال و الاحلام .. :
كانت تتمثل في " تيمون و بومبا " اللي كنت بسببهم بعيط من الضحك و كنت بعشق كل افيه طالع منهم و بعتبرهم ايقونتي في الحياة
و طبعا مش هنسى " علاء الدين " و الجني اللي كان بيحقق كل حاجة ببساطة و بضحكة و بخفة دم مبقيتش موجودة في الزمن دا ..
و عن عالم الشر : .. كان " بينكي و براين " هما كل ما اعلمه عن الشر و حلم السيطرة على العالم .. اللي يبدو ان في الواقع برضو في ناس لسة بيؤمنوا بنظرية براين في السيطرة على العالم ..
و المغامرة : كنت بحب البوكيمون اوي .. و يو جي اوه .. كنت بتابع الحلقات اكني انا اللي بلعب جوا .. و طبعا مش هنسى " سابق و لاحق " و اني اشتريت فوق ال5 عربيات من ام 35 جنية عشان العب معاهم !
و طبعا مش هنسى الوالدان " السحريان و تيمي تيرنر " و " داموستحيل " و " وظوظ و بطبط " و " الجاسوسات " و " الفتيات الخارقات " و " مدرسة الإمبراطور الجديدة " .. دول بتفرج عليهم لحد دلوقت بكامل متعتي و فرحي ..
و كمان عشان منساش .. انا افلام الكرتون هي اللي مخلياني عايش لحد دلوقت و خصوصا الأفلام العبيطة الجديدة كلها ..
كانت حياة حلوة ..
.......
و بعد كل دا احب اقول حاجة واحدة بس !
رجعولي كوكبي ..
- منير عادل
